نصائح مهمة للمحافظة على عيونك ونظرك من أضرار الإضاءة الناتجة من شاشات الهواتف الذكية والحواسيب والتلفاز
نصائح :
ح اشارككم ببعض النصائح الطبية والشخصية اللي جزء كبير منها انا بطبقو بصورة مستمرة👍💙
..
1- استخدم ميزة الإضاءة التلقائية للشاشة .. ودي اغلبكم بعرفها ☑️
يعني لما يكون في أضاء ضعيفة الشاشة اضاءتها تزيد تلقائيا عن طريق ال Sensor “الحساس” الموجود أعلى الشاشة .. ولما تكون الاضاءه الحوالينك قوية الشاشة اضاءتها تقل
دي اول حاجة بتحافظ ليك على البطارية
ثانياً الجهاز بيعكس ليك رؤية جيدة أثناء الاستخدام حسب نوع الإضاءة المتوفرة حوالينك في الغرفة أو الشارع أو المكتب أو غيرو ..☑️
2- اذا جهازك بيدعم ميزة ال Eye comfort أو وضع القراءة أو “حماية البصر” أو تصفية اللون الازرق ايا كان اسم الميزة في جهازك
انصحك تفعل الميزة دي لانها بتقلل من الاشعاعات الناتجة من حدة الالوان على الشاشة وبتخلي ليك اضاءة الجهاز اضاءه شمسية مائلة الأصفر الفاتح حسب نوع تلفونك .. لانو الالوان دي بتريح العين وبتقلل من الالم الناتج من السطوع والتركيز المستمر على شاشة الهاتف ☑️
3- لو بتتصفح على الانترنت او بتلعب لفترات طويلة أو خصوصاً الطلاب البيدرسو على الهاتف أو الحاسوب ..
حاول كل فترة ساعة ساعتين كدا حرك عيونك لمدة قصيرة عشان يحصل إفراز للمواد المساعدة على ترطيب العين وتحميها ليك من الجفاف الناتج من التركيز الشديد والهواء المحيط ☑️
4- نصيحة للناس البساهرو في الدراسة أو العمل على الشاشات المضيئة ..
اذا امكن اشتري ليك نظارة عادية وركب فيها عدسات Anti-reflection ..عشان تستخدمها بس لما يكون عندك شغل كتير بالليل علي الحاسوب أو الهاتف ..
وخصوصاً إذا كنت طافي اللمبة بتاعت الغرفة والإضاءة الوحيدة هي إضاءة الشاشة ..
هنا العدسات دي بتعكس الإضاءة الطالعة من الشاشة أو أي إضاءة قوية حوالينك في الغرفة ، وحتحافظ ليك على سلامة عيونك من ضعف النظر والتركيز ..
العدسات دي ما غالية حوالي 1000 ج حاليا اذا بالغت وبتتلقي في اي محل بتاع بصريات .. وانا شخصياً بستخدمها وانصح الناس البتقعد كتير قدام الشاشة انو تشتريها لأنها مفيدة جداً لسلامة النظر ☑️👍
5- لما تساهر كتير قدام الشاشة اكيد حترهق عيونك أول قبل جسمك .. ف لو حسيت بانو عيونك جافة وزي الفيها حصحاص كدا حاول بقدر الإمكان انو بعد ما تخلص من التلفون أو الحاسوب تغسل عيونك أو تعمل ليها كمادات بموية باردة أو دافية عشان تساعد خلايا العين على إفراز الدموع أو المادة المرطبة للتخلص من الجفاف والتصلب الناتج من الجلوس امام الشاشات لفترات طويلة ☑️
6- لو عندكم شاشة في البيت دائما خلي ارتفاعها على الحائط يكون مناسب بحيث أنو تكون زاوية الرؤية للشاشة موجهة أمام العين مباشرة أو بشكل مريح بدون ما تجتهد وتركز شديد عشان تشوف ..
لانو النظر في الشاشات لأعلى لفترات طويلة دا بيتسبب في زيادة فتحة العين ودخول الهواء اكتر من اللازم ف بالتالي حيجفف المادة المرطبة داخل العين
7- لما تقعد بالليل في الحاسوب أو الهاتف لمدة طويلة حاول نوم فترة كافية عشان ما تجهد العين وتزيد عليها الجهد الناتج من السهر أمام الشاشة ☑️
8- حاول بالليل خلي مسافة معقولة بين عيونك وبين شاشة الحاسوب أو الهاتف او التلفاز ☑️
9- لما تحس بانو الاضاءه عملت ليك آكولة في العين ما تدعكها بصورة مستمرة .. غسل وشك بموية باردة وارجع واصل شغلك ..
اما اذا الآكولة بقت مستمرة .. ما تستخدم اي قطرة من راسك وأتوجه مباشرة لطبيب عيون عشان يدلك على العلاج الصح ويساعدك على سلامة عيونك 👍💙
..
اخيرا حابي اقول انو الفترة الحالية الاستخدام للحاسوب والهواتف والشاشات الذكية كتيرة شديد .. نسبة لأنها بقت من أساسيات الحياة ..
وكمان اذا ربنا احيانا ومد من العمر الفترات الجاية داخلين على عصور اكثر تطور في عالم التكنولوجيا والشاشات الذكية واكيد الشاشات دي معظمها حاليا ومستقبلا حتكون مدمجة بتقنيات بتمنع باذن الله الضرر على العين
بس برضو بنقول العيون والنظر نعم غالية جداً جداً من ربنا نحمدو ونشكرو عليها .. ولولاها ما كان قريت البوست دا .. ف الحمدلله دائما وأبدا على نعمة البصر ..
كلنا كبار وصغار .. نساء ورجال .. شيباً وشباب لازم نحافظ عليها ونكون حريصين عليها شديد ، لأنها هي جوهر وطعم الحياة 💙✨
المصدر : سوشيال ميديا